రాఖీ పండగకి మా పెద్దక్క పోస్టులో రాఖీ పెట్టి పంపింది. నేను ఊరుకుంటానా ...?! జవాబు జాబులో ... రెండు వందల రూపాయలు పెట్టాను ... ఓ కవిత కొట్టాను ... ఆ కవితే ఇక్కడ పెట్టాను :
అక్కా నీ ఉత్తరం అరుదెంచింది
అందు బంధనం నా మదినలరించింది !
శ్రావణ పౌర్ణమి శోభలు కురిపించింది
తమ్ముడిపై నీదు ప్రేమ తలపించింది !!
అట్టముక్క మీద ఆర్టు చెక్కినట్టు గోచరించు
బంధనాన నీదు ప్రేమ కనిపించింది !
'బుజ్జీ' అని చేరదీసి ప్రేమ తోడ ఆదరించు
అక్కలుండటం లక్కీ అనిపించింది !!
అనుబంధపు సువాసనలు విరియిస్తున్న
బంధనాన్ని కరమున నే ధరియిస్తున్నా !
అర చతుర్ద్ధ శత రూకలు అందిస్తున్నా
ఆశీస్సున అక్షితలను ఆశిస్తున్నా !!
No comments:
Post a Comment